श्रीरामकृष्णस्तोत्राणि
श्रीरामकृष्णस्तुतिः
ज्योतिरेकं निराकारमचिन्त्यं शाश्वतं परम्
।
अद्वितीयं
चिद्घनं च बालरूपं दधत् पुरा ॥१॥
आगत्य परमे धानि महर्षित्रातमण्डिते ।
ऋषिमेकं
समाधिस्थं कण्ठाश्लेषमुवाच ह ॥२॥
लोकानामुपकाराय प्रागहं यामि भूतले ।
ततो नु
भवता नूनमागन्तव्यं तपोधन ॥३॥
❀ ❀ ❀
पितॄन् समुद्धर्तुमनाः खुदिरामः कदाचन ।
उपस्थाय
गयाधाम्नि पितृभ्यः पिण्डमाहरत् ॥४॥
गयाधिष्ठातृदेवो यो गदाधर इति श्रुतः ।
पितॄणां
दिव्यदेहानां पुरः स्वप्ने तमब्रवीत् ॥५॥
प्रीतोऽहमस्मि ते विप्र ! पितृभिः
प्रार्थितोऽनघ !
तव पुत्रो
भविष्यामि नान्यथा मम भाषितम् ॥६॥
कामारपुकुरग्रामसन्निधौ शिवमन्दिरे ।
गतायाश्चन्द्रमण्यास्तु शिवो ह्युदरमाविशत् ॥७॥
हंसारूढोऽपि भगवानेकदा परितोषितः ।
श्रीलां
चन्द्रमणिं देवीं दद्यादृष्ट्या व्यलोकयत् ॥८॥
❀ ❀ ❀
हुगलीमण्डले वङ्गे कामारपुकुराभिधे ।
ग्रामे
ज्योतिश्चयो बालो जन्म जग्राह सत्कुले ॥९॥
माता चन्द्रमणिस्तस्य खुदिरामोऽभवत् पिता ।
आस्तां
तदीयौ पितरौ भूसुरान्वयदीपकौ ॥१०॥
गदाधरलसन्नाम्ने रामकृष्णस्वरूपिणे ।
नामरूपविहीनाय देवदेवाय ते नमः ॥११॥
ब्राह्मकल्पेनोपनीतो ब्रह्मचर्यव्रते
स्थितः ।
स्वाध्याये नानुरक्तोऽपि सहजातमहामतिः ॥१२॥
भावावेशः, समाधिश्व, ज्योतिर्देहे च
संस्थितिः ।
यस्यासन्
सहजा धर्माः, रामकृष्णाय ते नमः ॥१३॥
स्वोद्वाहार्थं सचिन्ते च स्वजने
व्यग्रतां गते ।
स्वयमेव
समाधिस्थः सारदां सहधर्मिणीम् ॥१४॥
षड्वार्षिकीं कोमलाङ्गीं शारदं
शर्वरीश्वरम् ।
परिपूर्णं
ह्रेपयन्तीं स्वाकलङ्काननश्रिया ॥१५॥
निर्दिदेश, ततस्तस्याः पाणिं जग्राह
धर्मवित् ।
निःसङ्गादर्शरूपाय गृहस्थाय च ते नमः ॥१६॥
देवदर्शनमेलायां शिशुः श्रीसारदाऽपि च ।
स्वजनैर्नीयमाना सा हस्तावुद्यम्य पूर्वतः ॥१७॥
यं वरेण्यं महाभागं देवमानवरूपिणम् ।
पतिं
चक्रेऽप्रबुद्धाऽपि रामकृष्णाय ते नमः ॥१८॥
जामाता रासमण्यास्तु राण्याः कोटिपतिः
स्वयम् ।
तस्या
वसूनां सर्वेषां नियमेनाधिकारवान् ॥१९॥
सुप्रसन्नः सम्प्रदातुं प्रामान्
क्षेत्राणि चैहत ।
श्रुत्वैतत् क्रोधताम्राक्षो यष्ट्या तु तमताडयत् ॥२०॥
राणी रासमणिश्चापि दक्षिणेश्वरमागता ।
कालीसम्मुखमास्थाय ध्यानाभिनयतत्परा ॥२१॥
चिन्तयामास तत्रेयमभियोगफलाफलम् ।
ताडयित्वा
चपेटाभिः सावधानां चकार ताम् ॥२२॥
एकदा मरुदेशीयो लक्ष्मीनारायणो धनी ।
मुद्राणां
दशसाहस्रं भक्त्याऽर्पयितुमागतः ॥२३॥
तृणाय मत्वा न स्पृष्टं तद् धनं येन
साधुना ।
श्रीमात्राऽपि च तत्पत्न्या प्रत्याख्यातं तथैव च ॥२४॥
रूप्यादिधातुपात्राणां स्पर्शात्
सर्वाङ्गसम्भवः ।
कम्पः
प्रजायते यस्य नमस्ते त्यागरूपिणे ॥२५॥
तत्तद्धर्मोपास्तिकाले
तत्तद्धर्मप्रवर्तकाः ।
ईसामुहम्मदाद्याश्च स्वयं दृष्टिपथं ययुः ॥२६॥
अनन्तरं च ते सर्वे यस्य देहं समाश्रिताः ।
सर्वधर्मस्वरूपाय रामकृष्णाय ते नमः ॥२७॥
ब्रह्मविष्णुशिवाद्याश्च ये देवाः
श्रुतिसङ्गताः ।
रामकृष्णादयः सर्वे ह्यवतारास्तथैव च ॥२८॥
वाणीलक्ष्मीकालिकाद्या या
देव्योऽनन्तशक्तयः ।
सीताराधाप्रभृतयः शक्तयश्चावतारिणाम् ॥२९॥
निवसन्ति सदाऽऽश्रित्य यस्य देवस्य
विग्रहम् ।
सर्वदेवनिवासाय रामकृष्णाय ते नमः ॥३०॥
तीर्थभ्रमणकामेन दृष्टा वाराणसी पुरी ।
पुण्यैर्धवलिता शश्वद् विमला विमलात्मनाम् ॥३१॥
शम्भोत्रिशूले तिष्ठन्ती चञ्चच्चामीकरोपमा
।
ददाति
मुक्ति प्रेतेभ्यो यस्यां स सशिवः शिवः ॥३२॥
तस्यां प्रविष्ट एवाऽसौ शैवं कार्यं
विलोकयन् ।
समाधिमभजत्तूर्णं शिवध्यानपरायणः ॥३३॥
तैलङ्गं स्वामिनं जीवन्मुक्तमन्यांश्च
सत्तमान् ।
महता
भक्तिभावेन दर्श दर्शमपूपुजत् ॥३४॥
पुर्यामस्यां सुनिवसन्
धर्मभीरुर्जितेन्द्रियः ।
यो न
चक्रे मलं मूत्रं तस्मै धर्मात्मने नमः ॥३५॥
वृन्दावने प्रयागे च यत्रैव समुपस्थितः ।
तत्पुण्यधाम्नो माहात्म्यं स्वाचारैः पर्यपोषयत् ॥३६॥
तीर्थाटनस्य समये योऽन्येष्ववसरेषु च ।
सर्वथाऽतोषयद्दीनान् तस्मै दीनात्मने नमः ॥३७॥
बहूनां दासभक्तानां पापतापान् जहार यः ।
स्वयं च
क्लेशभाग् भूत्वा तं नुमः करुणानिधिम् ॥३८॥
तान्त्रिको वैष्णवो धर्मः संन्यासः
शाङ्करस्तथा ।
सम्यक्
संसाधितो येन रामकृष्णाय ते नमः ॥३९॥
ब्रह्मानन्दशिवानन्दौ विवेकानन्द एव च ।
निरञ्जनानन्द उत प्रेमानन्दो महामतिः ॥४०॥
तुरीयानन्द-त्रिगुणातीतानन्दौ बुधोत्तमौ ।
अभेदाखण्डयोगाद्याऽऽनन्दाः संन्यासिसत्तमाः ॥४१॥
अन्ये च बहवस्त्यागतपस्यायोगविश्रुताः ।
संन्यस्त
काम्यकर्माणो यस्य शिष्यत्वमागताः ॥४२॥
नमस्ते प्रेमरूपाय सर्वधर्मात्मने नमः ।
नमः
परमहंसाय प्राणिमात्रप्रियाय च ॥४३॥
कालीपरमभक्ताय कालिकाऽभेदरूपिणे ।
सर्वावतारगुरवे सर्वतेजोमयाय च ॥४४॥
सशक्तिकाय महसां निधये शाश्वतत्विषे ।
परात्पराय
महते नमः श्रीवेदमूर्तये ॥४५॥
पण्डितश्रीगोपालचन्द्रचक्रवर्ति-वेदान्तशास्त्रिविरचिता श्रीरामकृष्णस्तुतिरयं समाप्ता ।
❀ ❀ ❀